विरार पूर्व आणि पश्चिमेला जोडणाऱ्या आणि गेल्या अनेक वर्षांपासून रखडलेल्या बहुचर्चित ‘नारिंगी रेल्वे उड्डाणपुलाचे’ शुक्रवारी (८ मे) दिमाखात लोकार्पण करण्यात आले. पालघर जिल्ह्याचे पालकमंत्री गणेश नाईक यांच्या हस्ते या पुलाचे उद्घाटन झाल्याने विरारकरांचा प्रवास आता अधिक सुखकर आणि वेगवान होणार आहे. या नवीन पुलामुळे विरारमधील जुन्या रेल्वे फाटकावरील वाहतूक कोंडीतून नागरिकांची कायमची सुटका झाली आहे.
वाहतूक कोंडीला मिळणार लगाम वसई-विरार शहराचे झपाट्याने होणारे नागरीकरण पाहता अंतर्गत वाहतुकीचा प्रश्न गंभीर झाला होता. विरार पूर्व-पश्चिम जोडणारा हा चौपदरी पूल ७२५ मीटर लांबीचा असून १४ मीटर रुंद आहे. सार्वजनिक बांधकाम विभागाने सुमारे २४ कोटी रुपये खर्चून हा प्रकल्प पूर्ण केला आहे. या पुलामुळे विरार पश्चिमेतील रुस्तमजी ग्लोबल सिटी परिसर थेट पूर्वेकडील साईनाथ नगर आणि पुढे मुंबई-अहमदाबाद महामार्गाशी जोडला जाणार आहे. यामुळे प्रवासाच्या वेळेत किमान २० ते ३० मिनिटांची बचत होणार असून इंधनाचीही बचत होईल.
राजकीय श्रेयवाद आणि पाठपुरावा या पुलाच्या कामासाठी राजकीय स्तरावर मोठी चढाओढ पाहायला मिळाली. बहुजन विकास आघाडीचे सर्वेसर्वा आणि माजी आमदार हितेंद्र ठाकूर यांनी या प्रकल्पासाठी सातत्याने पाठपुरावा केल्याचा दावा पक्षाकडून करण्यात आला आहे. सुरुवातीला दोन पदरी असलेल्या या पुलाचा आराखडा बदलून तो चार पदरी करण्यात आला, ज्यामुळे काम पूर्ण होण्यास थोडा विलंब झाला. दुसरीकडे, सत्तांतरानंतर महायुती सरकारने या कामाला गती दिल्याचे भाजपतर्फे सांगण्यात आले.
लोकार्पण सोहळ्याला मान्यवरांची उपस्थिती या उद्घाटन प्रसंगी पालकमंत्री गणेश नाईक यांच्यासह महापौर अजीव पाटील, आमदार राजन नाईक, आमदार राजेंद्र गावित, आमदार स्नेहा दुबे पंडित आणि इतर स्थानिक लोकप्रतिनिधी उपस्थित होते. “शहराच्या सर्वांगीण विकासासाठी पायाभूत सुविधांचे जाळे विणणे आवश्यक असून, प्रस्तावित असलेल्या अन्य प्रकल्पांनाही लवकरच गती दिली जाईल,” असे आश्वासन यावेळी पालकमंत्र्यांनी दिले.
रेल्वे फाटकाचा प्रश्न नारिंगी उड्डाणपूल सुरू झाल्यामुळे आता नारिंगी येथील रेल्वे फाटक (एलसी ४१) कायमचे बंद होण्याची शक्यता आहे. मात्र, स्थानिक पादचाऱ्यांची गैरसोय होऊ नये म्हणून तेथे भुयारी मार्ग (सबवे) असावा, अशी मागणी नागरिकांकडून केली जात आहे.
