मुंबईतील एका नामांकित शाळेतून माणुसकीला काळिमा फासणारी घटना समोर आली आहे. शाळेतील एका नराधम शिपायाने ६ वर्षीय विद्यार्थ्यावर लैंगिक अत्याचार केल्याचा धक्कादायक प्रकार उघडकीस आला आहे. धक्कादायक बाब म्हणजे, हा अत्याचार गेल्या वर्षभरापासून सुरू होता. याप्रकरणी पोलिसांनी आरोपी शिपायाला अटक केली असून परिसरात तीव्र संताप व्यक्त केला जात आहे.
नेमकी घटना काय? मिळालेल्या माहितीनुसार, आरोपी शिपाई पीडित विद्यार्थ्याला शाळेतील एका रिकाम्या खोलीत घेऊन जात असे. तिथे तो त्याच्यासोबत अश्लील कृत्य करत असे. गेल्या वर्षभरापासून हा प्रकार सुरू होता, मात्र भीतीपोटी हा चिमुरडा काहीही बोलू शकला नव्हता. अखेर पीडित विद्यार्थ्याच्या वागण्यात बदल झाल्याचे पालकांच्या लक्षात आले आणि विश्वासात घेऊन विचारपूस केली असता हा सर्व प्रकार उघड झाला.
शाळेच्या सुरक्षिततेवर प्रश्नचिन्ह: एकीकडे शाळांना ‘विद्येचे मंदिर’ मानले जाते, तर दुसरीकडे अशा घटनांमुळे पालकांमध्ये भीतीचे वातावरण आहे. नामांकित शाळेत अशा प्रकारे वर्षभर अत्याचार सुरू असताना शालेय प्रशासन आणि शिक्षकांना याची पुसटशीही कल्पना कशी आली नाही? असा संतप्त सवाल आता उपस्थित केला जात आहे.
पोलीस कारवाई: पालकांनी तात्काळ पोलीस ठाण्यात धाव घेत तक्रार दाखल केली. पोलिसांनी तत्परता दाखवत आरोपी शिपायावर ‘पोक्सो’ (POCSO) कायद्यांतर्गत आणि विविध कलमान्वये गुन्हा दाखल करून त्याला बेड्या ठोकल्या आहेत.
